Fondi Monetar Ndërkombëtar ka kërkuar nga qeveria që të zëvendësojë Bordin e Transparencës që monitoron çmimet e disa artikujve ushqimorë bazë me mbështetje për të varfrit dhe shtresat e ekspozuara.
Në deklaratën e djeshme FMN theksoi se përpjekjet për përmirësimin e sistemit të mbrojtjes sociale në vend duhet të vazhdojnë.
“Duke marrë parasysh sfidat e bordit të transparencës që monitoron çmimet e disa artikujve ushqimorë bazë, ne e shohim me vend zëvendësimin e tij me mbështetje të mirëorientuar për të varfrit dhe shtresat e ekspozuara me qëllim mbrojtjen e tyre nga efektet e rritjes së ҫmimeve. Për këtë arsye, përpjekjet për përmirësimin e sistemit të mbrojtjes sociale në vend duhet të vazhdojnë, duke përfshirë dhe zgjerimin e mbulimit të shtresës së varfër dhe në nevojë në sektorin informal”, deklaroi FMN.
Sipas FMN, ekonomia e Shqipërisë po përballet me presionet që vijnë si pasojë e luftës në Ukrainë, përmes rritjes së menjëhershme të çmimeve dhe shtrëngimit të mëtejshëm të kushteve financiare globale.
