Prokuroria e Posaçme është “zgjuar” dhe hetimet për koncesionin e sterilizimit të pajisjeve kirurgjikale në spitalet shqiptare, kanë përparuar me marrjen në pyetje të personave, që kanë ndjekur këtë procedurë. Mes personave që janë marrë në pyetje është edhe Saimir Kadiu, njëri prej anëtarëve të Komisionit të Koncesionit, që ka firmosur, teksa të tjerët pritet që të dëshmojnë në ditët në vazhdim.
Por për çfarë u pyet ai dhe është penduar për firmën që ka hedhur? “5pyetjet.al” e kontaktoi zotin Kadiu, i cili nuk preferoi që të japë shumë detaje nga dëshmia për shkak të sekretit hetimor. “Po, SPAK më ka thirrur për të dhënë dëshmi. Thjesht si njeri që ka dijeni”. “Ka disa ditë” tha ai që ka dhënë dëshminë përpara prokurorëve të strukturës së posaçme. “Nuk zgjati shumë, iu përgjigja pyetjeve që më bënë prokurorët” tha më tej Kadiu.
Por çfarë është koncesioni i sterilizimit?
Kontrata e sterilizimit të pajisjeve kirurgjikale është një prej projekteve të Partneritetit Publik-Privat me mbështetje buxhetore në sektorin e shëndetësisë.
Kontrata u firmos në dhjetor 2015 mes ish-ministrit të Shëndetësisë, Ilir Beqja dhe kompanisë koncesionare SaniService –aksionerët e së cilës janë Investital LLC dhe kompanitë italiane “Servizi Italia”, “Tecnosanimed” dhe “U.Jet S.r.l”.
Paketën më të madhe me 40 për qind të aksioneve e zotëron Investital LLC- një kompani e vogël e themeluar me kapital 1 mijë euro në Kosovë nga Ilir Rrapaj.
Kompania koncesionare e nisi punën nga një stacion modern sterilizimi i ndërtuar në Qendrën Spitalore Universitare “Nënë Tereza” me kredi të qeverisë shqiptare, por që nuk ishte vënë për asnjë ditë në punë.
Sipas një raporti të KLSH, pajisje me vlerë mbi 107 milionë lekë të blera nga qeveria shqiptare iu dhuruan koncesionarit pa pagesë dhe pa asnjë parashikim në kontratë.
Qendra e sterilizimit ishte ndërtuar në vitin 2009 përmes një kredie që qeveria shqiptare kishte marrë në Bankën e Këshillit të Europës –CEB. Transferimi i saj nën administrimin e koncesionarit u bë pjesë e hetimit të kryer nga Prokuroria e Tiranës –i cili u pushua në shtator 2016 pa pasoja.
Dokumentet e hetimit tregojnë gjithashtu se Ministria e Shëndetësisë e paracaktoi dhënien e shërbimit me koncesion dhe u përball me hezitimin e ish-ministrit të Financave, Shkëlqim Cani për ta miratuar atë.
Dy ish-ministrat shkëmbyen korrespondencë nga tetori 2015 deri në janar 2016, ku Cani kërkoi fillimisht që të argumentohej se pse ishte zgjedhur koncesioni dhe jo prokurimi i zakonshëm.
Ish-ministri i Financave paralajmëroi gjithashtu rritjen e kostove përtej tavaneve buxhetore, por e miratoi kontratën me kushtin që financimi i projektit të respektonte në mënyrë rigoroze limitin buxhetor të parashikuar për këto shërbime.
“Lidhur me riskun e kërkesës, duke qenë dakord me mënyrën e përballimit të tij do të kërkonim që Ministria e Shëndetësisë të marrë të gjitha masat e duhura, që ky risk të minimizohet sa më shumë që të jetë e mundur përgjatë periudhës së koncesionit,” shkruante Cani në janar 2015.
