Policia e shtetit ka bërë bilancin e javës që lamë pas ku ka cilësuar si dy nga operacionet më të rëndësishme atë të sekuestrimit të pasurisë së Gentian Sharrës, i akuzuar për një sërë vrasjes në Shqipëri si dhe nga operacioni i koduar “Syri i Sheganit”, ku u kap grabitësi i bankës në Koplik dhe u asgjësuan qindra rrënjë kanabis.
“Si rezultat i angazhimit dhe profesionalizmit maksimal të strukturave të Policisë së Shtetit, në një javë, u finalizuan me sukses 2 megaoperacione policore:
•”Syri i Sheganit” në Shkodër, si rezultat i të cilit u zbardh grabitja me armë e një filiali banke, në Koplik, Malësi të Madhe, si dhe u zbulua një banesë e përshtatur për kultivim të bimëve narkotike, me anë të llambave. U vunë në pranga 9 shtetas dhe u sekuestruan 31 kg kanabis dhe 1 armë zjarri;
•“Illegal assets” në Elbasan, për sekuestrimin e pasurive që rrjedhin nga veprimtaria kriminale, si rezultat i të cilit u sekuestruan pasuri të ndryshme, me vlerë rreth 5 milionë euro.” ka njoftuar policia.
