Shumica socialiste nuk tërhiqet nga harta e re gjyqësore. E ndërsa avokatët janë në bojkot prej ditës së djeshme dhe deri të premten, shpresë për tërheqje nuk ka.
Numri dy i PS-së, sekretari i përgjithshëm Damian Gjiknuri u shpreh sot te Komisioni i Ligjeve se ky variant i hartës do të jetë finali.
“Unë dua të jap dy konkluzione për atë që synohet; kjo do i shërbejë reduktimit të çështjeve dhe menaxhimit të flukseve, konflikteve që do të dalin.
Kjo niset nga parimi i eficencës. Me interes është si do të zbatohet harta e re nëse do të rrijë ai variant final, që besoj që i tillë do të mbetet.
Vitin tjetër do të shohim cfarë mund të korrigjohet. Njëherë në pesë vite rishikohet. Kjo nuk është hera e parë që ndodh. Ka ndodhur edhe në 2009.
Me dekret presidenti bëhej një reformë. Ndoshta kanë menduar si ta bënin sistemin më eficent. Ka pasur argumente politike.
Unë atëherë isha deputeti i Gramshit, mbaj mend “pse po na mbyllej gjykata”. Këto histori kanë qenë gjithmonë. Koncentrimi i shërbimeve sjell cilësi më të mirë” tha Gjiknuri.
