Mbrëmjen e djeshme një person i armatosur është futur brenda një kishe në Alabama dhe ka qëlluar njerëzit që ndodheshin aty.
Si pasojë kanë mbetur të vdekur 2 persona dhe është plagosur një tjetër.
Sulmi ndodhi në Kishën Episkopate të Shën Stefanit në Vestavia Hills, në periferi të Birmingamit, tha shefi i policisë Shane Ware. Ai tha se policia kishte pranuar telefonatë në orën 18:20, sipas kohës lokale, për një sulmues aktiv.
Ware tha se i dyshuari është arrestuar dhe “nuk ka asnjë rrezik për komunitetit tani për tani”.
Policia nuk e ka identifikuar sulmuesin as viktimat dhe nuk ka ofruar asnjë detaj për sulmin.
Shtetet e Bashkuara janë përballur së fundmi me disa sulme me armë zjarri. Më 14 maj u vranë dhjetë afrikano-amerikanë në një dyqan ushqimor në Bufallo të Nju Jorkut. Një javë më pas, një sulmues vrau 19 fëmijë dhe dy të rritur në një shkollë fillore në Uvalde të Teksasit.
Të shtunën, më 11 qershor, mijëra persona në Uashington u mblodhën duke kërkuar masa më të rrepta për kontrollin e armëve.
