Në Kosovë kanë arritur vaksinat e para anti-COVID për fëmijë të dhuruara nga Shtetet e Bashkuara të Amerikës.
“Sot, në Kosovë mbërritën vaksinat e para pediatrike kundër COVID-19, të dhuruara nga SHBA-ja, kjo dërgesë me doza pediatrike do të ndihmojë në mbrojtjen e fëmijëve nga ky virus vdekjeprurës”, thuhet në njoftimin e USAID-it.
Ndryshe, Instituti Kombëtar i Shëndetit Publik të Kosovës, ka bërë të ditur të mërkurën se në mbi 15 për qind ka shkuar pozitiviteti i rasteve me COVID-19 në raport me testimet në vend.
Sipas të dhënave të IKSHPK-së, të mërkurën janë regjistruar 43 raste të reja nga testimi i 275 mostrave.
Kosova, muajve të fundit nuk ka pasur shifër kaq të lartë të rasteve të reja pozitive.
IKSHPK, ka bërë të ditur se gjatë 24 orëve janë shëruar 8 persona.
Ndërsa, numri i rasteve aktive është 154.
Brenda 24 orëve të fundit, në Kosovë janë vaksinuar 46 persona.
