Kryeministri Edi Rama është optimist për hapjen e negociatave. Sot në një konferencë me gazetarët pasi u kthye nga Madridi, Edi Rama tregoi se ka pasur biseda të gjata me presidentin e Francës deri në propozimin e fundit për Shkupin, të cilit i bëri thirrje ta pranojë për t’i hapur rrugën hapit të radhës për ecurinë e dy vendeve.
“Edhe pas mesnate kemi shkëmbyer mesazhe me Macron për këtë proces. Propozimi i ri që është edhe përfundimtari. Duhet ta kuptojnë mirë vëllezërit tanë në Maqedoninë e Veriut. Është plotësisht i pranueshëm dhe qeveria, parlamenti duhet ta pranojë pa asnjë hezitim. Është kapërcyer një ngërç dhe janë eliminuar disa nuanca që e bënin të papranueshëm propozimin e mëparshëm” tha ai.
“Ne nuk kemi asnjë shqetësim me Bullgarinë veç qasjes së saj dhe pengmarrja e Maqedonisë dhe Shqipërisë në kushtet e një procesi që mund të kishte qenë më shumë civil dhe europian nga Bullgaria, por është një ujë që ka kaluar nën urë dhe me mbylljen e procesit të shqyrtimit dhe uroj aprovimit nga Maqedonia të propozimit të fundit, nuk kam më asgjë për të shtuar për Bullgarinë” tha ai.
