E moshuara Merita Hajdari, e cila rezultoi “miliardere” e inceneratorëve, por që në të vërtetë jetonte me mbledhjen e kanoçeve në kosha, bëri një rrëfim prekës për problemet e shumta dhe jetën e vështirë, ndërsa tashmë e përfshinë edhe në skemën kriminale të impianteve të mbetjeve.
“Më 2017 më humbi karta e identitetit. Unë nuk kam biznese, jam fukareshë, jam invalidë, e sëmurë me azmë.
Unë jetoj e punoj në një shtëpi, shkoj te fruta-perime seleksionoj aty dhe më japin ndonjë ushqim. Paguaj banka, sepse më 2019 unë jam djegur.
Më ka plasur bombola me gjithë djalin dhe shteti nuk na dha asnjë shpërblim, që u dogja, dhe shkova në spital në gjendje kome. Unë pastroj shkallë, për bukën e gojës, nuk kam të ardhura.
Jam kreditore, më 15 kam për të paguar bankën dhe nuk kam me çfarë ta paguaj. Dua një drejtësi timen, kush m’i ka bërë këto gjëra, që unë jam biznesmene”, tha ajo te News24.
