Dy orë pas aksidentit makina me të cilën udhëtonte 27-vjeçari F.M është nxjerrë nga poshtë kamionit, ku përfundoi mesditën e sotme.

27-vjeçari humbi jetën në vendin e ngjarjes pasi përplasja ishte shumë e fortë dhe makina ishte kthyer në një grumbull hekurash.

Rreth orës 12:00 në vendin e quajtur Bishti i Zhurit në Rrogozhinë, makina përfundoi poshtë rrotave të kamionit. Ende po punohet për tu mësuar shkaku i aksidentit.

Njoftimi i policisë:

DVP Tiranë/Informacion shtesë sqarues

Në lidhje me aksidentin e ndodhur ditën e sotme, në vendin e quajtur “Bishti i Zhurit”, ku mjeti kamion me drejtues shtetasin I. C. u përplas me mjetin tip “Benz” me drejtues shtetasin F. M., 27 vjeç, ju informojmë se si pasojë e aksidentit drejtuesi i mjetit tip “Benz” ka humbur jetën.

Grupi hetimor ndodhet në vendngjarje dhe po punon për sqarimin e rrethanave të aksidentit.