Një rrjet i madh trafiku droge është zbuluar nga prokuroria në Peruxhia. Mësohet se të përfshirë në këtë rrjetë kanë qenë italianë, por edhe shqiptarë.
Hetimet e kryera nga prokuroria italiane zbuluan se trafiku i drogës kryhej në formën e call-centerave. Porositë bëheshin në Shqipëri, dhe shpërndarja më pas në Itali.
Sipas hetuesve, tregtarët e drogës ishin të organizuar “sipas një rotacioni metodik në Itali, i karakterizuar nga periudha të shkurtra dhe intensive të shpërndarjes së drogës”. Ata largoheshin më pas për të qëndruar me muaj në vendin e origjinës.
“Kontaktet me blerësit mbaheshin nga një anëtar i grupit kriminal, me vendndodhje në Shqipëri.
Ai më pas ia komunikonte porosinë shpërndarësve të ndryshëm që mund të kishte të pranishëm më afër klientit në Itali.
Shpërndarësi i kokainës kishte një apartament dhe një automjet, ndërsa qarkullimi i lëndës narkotike përllogaritet në rreth 10 mijë euro në muaj”, sqarojnë agjentët e Antimafias së Peruxhias.
