Ish-kryeministri Sali Berisha ka zhvilluar këtë pasdite një bashkëbisedim me qytetarët në Dibër me temën ‘Dibra në rrezik’.
Berisha i ka bërë thirrje qytetarëve të mbrojnë Dibrën nga projekti antikombëtar i Skavicës.
Ai u shpreh se nëse 40 fshatra të saj përmbyten nga ky projekt, Dibra do të mbetet një emër në librat e historisë.
Kreu i PD i bëri thirrje edhe kompanisë Bechtel që të tërhiqet nga projekti i Skavicës duke iu thënë atyre se Edi Rama po i mashtron
“Nuk mund të zhduket Dibra. Nuk e zhdukën dot pushtuesit më të egër që e lakmuan aq shumë. Vjen Edi Rama ta zhdukë me një projekt të Enver Hoxhës. Thirrja për çdo dibran e shqiptar, ta shpëtojmë Dibrën. Të mbrojmë ekzistencën e Dibrës.
Nëse 40 fshatra të saj përmbyten, Dibra do mbetet një emër në librat e historisë. I bëj thirrje kompanisë, i them se mbetem mirënjohës ndaj saj për Rrugën e Kombit por i kërkoj të tërhiqet nga projekti, ky është një projekt absolutisht çnjerëzor në rrafshin njerëzor, social, projekt antikombëtar, ndaj dhe mos u mashtroni nga Edi Rama. Do bëjmë gjithçka për të mbrojtur Dibrën, për të mbrojtur të shkuarën dhe të ardhmen e saj”, tha Berisha.
