Gjykata e Elbasanit ka vendosur sot që të lërë në burg pa afat dy rusët dhe ukrainasin e akuzuar për spiunazh. Mikhail Zorin, Zvetlana Timofevva si dhe ukrainasi Fedis Alpatov do të qëndrojnë në burg deri në përfundim të hetimeve.
Tashmë pritet nëse rusët dhe ukrainasi do të apelojnë vendimin brenda pesë ditëve.
Avokati shqiptar i Zorin, i zgjedhur kryesisht deklaroi se nuk ka pranuar që ka qenë i kontaktuar nga agjentura ruse dhe se sprajin kundër ushtarëve e përdori për mbrojtje.
“Deklarimet janë sekret hetimor, nuk dhanë sqarime me detaje. Do i mbetet hetimit kjo situatë.
Unë nuk mund të them asgjë. Kam kërkuar që ai është konfliktuar dhe debatuar, ka përdorur një spraj me spec djegës, pasi është ndjerë i dhunuar.
Kërkuam të njiheshim mbi materialet, por nuk na i treguan. Klienti im nuk i pranoi akuzat. Ai nuk ka deklaruar se është kontaktuar nga agjentë rusë.
Askush nga ambasada ruse apo ukrainase nuk më ka kontaktuar. Kërkoi një masë më të butë” deklaroi ai.
Avokati Saimir Vishaj që mbrojti ukrainasin Fedis Alpatov kërkoi që procesi i marrjes së tij në pyetje të shpallet i pavlefshëm.
Ai pretendon se ukrainasi është marrë në pyetje në gjuhën ruse dhe jo në të tijën. Gjithashtu ai tha se rusët dhe ukrainasi nuk janë lejuar që të zgjedhin avokatët.
“Nuk mund të pyetet në gjuhën ruse, gjuha e tij është ajo ukrainase. Prandaj kërkuam pavlefshmëri. Edhe dy të tjerët kërkuan të mbrohen me avokatë të zgjedhur, gjykata i caktoi kryesisht.
U dëmtua e drejta. Në lidhje me akuzat, ju e dëgjuat vetë, policia dështoi. U regjistruan 5 vepra penale dhe mbetën 2.
Goditje për shkak të detyrës, sprai nuk është armë kimike. Sigurimi i të dhënave sekrete.
Nuk ka fakt penal që të bësh fotografi në një objekt që nuk ka asnjë mjet sinjalistik. Nuk ka fakt penal. Ukrainasi që mbroj nuk ka pasur lidhje me shërbimet ruse” tha Vishaj.
