Ish-presidenti Ilir Meta ka regauar sërish ndaj fenomenit të ikjes së të rinjve nga Shqipëria drejt vendeve të BE-së.
Ai ka prekur historinë e binjakëve ekselentë, të cilët pas mbarimit të studimeve në Universitetin e Mjekësisë, kanë shprehur dëshirën për tu larguar në Gjermani.
“Historia e vëllezërve binjakë, studentë të ekselencës, Mario dhe Xhulio Popa është sa mbresëlënëse, po aq dhe trishtuese. Fitues absolutë në degën e Mjekësisë në Universitetin e Tiranës, ata thonë se pas përfundimit të studimeve të ardhmen e tyre e mendojnë jashtë vendit.
Si vëllezërit Popa janë me mijëra të rinj në Shqipëri, që në mungesë të shpresës këtu, bëjnë përpjekje çdo ditë për t’u larguar.
Të frenojmë ikjen e të rinjve tanë më të talentuar duke ju krijuar kushte dhe mundësi më të mira për arsimim dhe punësim, që të shprehin potencialet e vërteta dhe të ndërtojnë të ardhmen e tyre në vend.
Shqipëria ka diell për të gjithë!” ka shkruar Meta.
