Zyrtari rus i emëruar si komandant për qytetin juglindor të Ukrainës, Berdiansk, u plagos pasi makina e tij u hodh në erë pranë zyrave ushtarake.
“Sot, 6 shtator, në qendër të Berdiansk, pranë ndërtesës së Administratës Civile Ushtarake, u hodh në erë makina e komandantit të qytetit Artem Bardin,” tha zyra e kryetarit. “Si pasojë e shpërthimit, komandanti i qytetit u shtrua në spital në gjendje të rëndë. Mjekët po i ofrojnë kujdesin e nevojshëm mjekësor”.
Nuk ishte menjëherë e qartë se çfarë e shkaktoi shpërthimin, por autoritetet pro-ruse fajësuan Ukrainën.
“Terroristët e regjimit të Kievit vazhdojnë të përpiqen të frikësojnë banorët e territoreve të çliruara”, tha zyra e kryebashkiakut pro-ruse.
Nuk pati viktima të tjera, por tre makina të tjera u dëmtuan, thanë gjithashtu autoritetet.
