Nga akuzat e forta debati në parlament përfundoi te batutat dhe urimet. Tensionet i uli ditëlindja e Fatos Nanos.
Gjithçka nisi nga akuzat e deputetit Edmond Spaho për aferat e qeverisë duke i kërkuar që të ndryshojë, sikur tha ai “trunin”. Por Taulant Balla e pyeti, përse ai nuk e ndryshon Saliun.
Deputeti demokrat reagoi duke i kujtuar Fatos Nanon dhe Balla replikoi duke thënë se ish-kryeministri socialist, që nesër mbush 70-vjeç vendosi standarde në politikën shqiptare.
Debati në parlament
Edmond Spaho: Ndërroni trunin. Kush është arrestuar për naftën kontrabandë, kush e ka porositur, kush i ka marrë dy të parat. Do kapni njeri? Kemi thyer edhe sanksionet. Ndryshoni trunin.
Taulant Balla: Zoti Spaho ka ardhur koha të na tregosh ca gjëra, ne na thua ndërroni trunin, po ti pse nuk e ndërron Saliun? Të bie më mirë.
Edmond Spaho: Unë nuk i ndërroj brenda natës, si ndërrove ti Fatos Nanon. Kur të ndërrosh ti Edi Ramën do të ndërroj edhe unë Saliun.
Taulant Balla: Mondi, Fatos Nanos, ju i vini aty ku nuk thuhet. Sepse e para, është një politikan që ka vendosur një standard që do të kishte qenë mirë që Saliut yt ta kishte ndjekur, që kur ikin, ikin, sa për raportin tim personal është i njëjtë sikur ka qenë ditën e parë.
Nuk urohet ditëlindja para kohe, Fatosi nesër mbush 70 vjeç dhe sigurisht është një politikan që ka vendosur ca standarde që të gjithë të mblidheni nuk i vendosni.
Sa për korrektesën time në marrëdhënie me Ramën dhe PS-në kjo është një gjë që ëshë shumë herët për të shkruar kujtimet e mia. Kam shumë kohë përpara.
Tritan Shehu: Së pari meqë nesër ka ditëlindjen zoti Nano, i uroj jetë të lumtur dhe 100 vite të tjera.
