“Pandemia mori fund. Ne ende kemi problem me Covid-in. Kemi ende shumë punë për të bërë. Por pandemia përfundoi”.
Këto ishin fjalët e presidentit amerikan, Joe Biden, në një intervistë dhënë për CBS, një deklaratë që duket se ekspertët e shëndetit publik i gjeti të papërgatitur, pasi sipas tyre, jemi ende në pandemi dhe këtë e tregojnë shifrat.
Për këtë çështje foli në A2 Sulejman Çelaj, drejtori i Departamentit të Kardiologjisë në Bronx të Nju-Jorkut. Ai u shpreh se pandemia është politizuar që prej fillimit të pandemisë.
“Kjo është një çështje që nuk e njeh as Biden. Covid ka dhe do të ketë. Ai nuk mund të largohet me masat që kemi deri tani, të cilat nuk janë efikase. Për fat të mirë, virulenca e virusit ka rënë ndjeshëm gjatë kësaj kohe dhe prandaj po shohim rënie të rasteve. Por nuk mund ta shohim se pandemia ka mbaruar, por ka rënë virulenca”, u shpreh mjeku.
