Qeveria duket se vuri mend pas asaj që ndodhi me Ilir Metën duke depozituar nismën e re për dekoratat. Projektligji për “Dekoratat” kufizon numrin e tyre duke i vendosur Presidentit një numër të caktuar brenda vitit.
Pra kreu i shtetit nuk mund të japë dekorata pa limit. Gjithashtu propozimet duhet të kalojë më përpara në komision.
Opozita e kundërshtoi. Ervin Salianji dhe Flamur Noka u shprehën hapur kundër propozimit dje në komisionin e sigurisë.
“Pse duhet t’i merrni Presidentit të Republikës një akt në emër të Republikës. Edhe dekoratat doni të politizoni?! Edhe me dekorata doni të merrni vota?
I jepni të drejtë edhe ministrave të Brendshëm dhe të Mbrojtjes për të dhënë dekorata. Ju po e kufizoni dhe kjo është një e drejtë përmbajtjesore që ka Presidenti i Republikës”, tha Salianji.
“Është shumë qesharake” tha Noka. Ministrja Spiropali e mbrojti nismën. Artan Lame, në rolin e ekspertit tha se “dekoratat maksimale janë të limituara jashtëzakonisht në numër”. Debati vazhdon.