Si eksportet edhe importet kanë shënuar rritje për gushtin e vitit 2022 në krahasim me të njëjtën periudhë të një viti më parë.
Kështu ka rezultuar nga një raport i fundit i INSTAT-it mbi tregtinë e jashtme të mallave.
Eksportet e mallrave për gushtin e vitit 2022 arritën vlerën 35 miliard lekë, duke u rritur me 48,1 për qind, në krahasim me të njëjtën periudhë të një viti më parë.
Por kanë shënuar rënie me 10,8 për qind, në krahasim me korrikun e vitit 2022.
Ndërsa importet e mallrave arritën vlerën 80 miliard lekë, duke u rritur me 30,8 për qind, në krahasim me një vit më parë dhe duke u ulur me 2,6 për qind, në krahasim me korrikun 2022.
Defiçiti tregtar i këtij muaji është 44 miliard lekë, duke u rritur me 19,6 për qind, krahasuar me gushtin e vitit 2021 dhe me 5,2 për qind, në krahasim me korrikun e këtij viti.
Kurse në këtë tetëmujor eksportet e mallrave arritën vlerën 328 miliard lekë, duke u rritur me 41,0 për qind, ndërkohë importet e mallrave arritën vlerën 607 miliard lekë, duke u rritur me 24,8 për qind, krahasuar me një vit më parë.
Deficiti tregtar arriti vlerën 280 miliard lekë, duke u rritur me 10,0 për qind, krahasuar me të njëjtën periudhë të 2021.
Kontributi i grupeve kryesore në ndryshimin vjetor të eksporteve:
Gjatë muajit gusht të këtij viti, në rritjen e eksporteve kanë ndikuar pozitivisht grupet: “Minerale, lëndë djegëse dhe energji elektrike” me +19,4 pikë përqindje, “Materiale ndërtimi dhe metale” me +14,8 pikë përqindje dhe “Tekstile dhe këpucë” me +5,6 pikë përqindje .
