Qeveria Rama është e vendosur për miratimin e amnistisë fiskale dhe penale. Pavarësisht kundërshtisë së fortë të BE-së, ministrja e Financave, Delina Ibrahimaj tha sot se do të vijohet me miratimin e nismës.
“Ne kemi qenë shumë të qartë në qëllimin e amnistisë fiskale dhe penale. Ne iu drejtuam të gjithë popullatës dhe pjesa më e madhe u shpreh se ishin pro amnistisë fiskale dhe penale për legalizimin e të ardhurave të emigrantëve. Ligji vepron brenda kufijve të Shqipërisë dhe do të aplikohet për të gjithë shqiptarët” tha ministrja.
Por a ka lidhje amnistia me legalizimet e kateve pa leje që po bëhen me aktin e fundit normativ për bosët e ndërtimit? “Nuk mund të ketë legalizime të një ndërtimi të paligjshëm. Procesi i amnistisë ka filluar shumë më parë” tha ajo.
Ministrja u shpreh e vendosur duke thënë se Bordi i Karburanteve nuk do të shkrihet. “Në cdo rast që ndryshon bëhet në varësi të bursës.
Unë kam bindjen e plotë, që marzhet e fitimit të bizneseve të hidrokarbureve janë më të ulëta se një vit më parë pas vendosjes së bordeve” tha Ibrahimaj.
