Të paktën 11 persona mbetën të plagosur pas të shtënave me armë në një festë në shtëpinë e vëllazërisë pranë Universitetit Jugor të Luizianës. Dy persona janë arrestuar në lidhje me të shtënat. Të plagosurit ndodhen në spital jashtë rrezikut për jetën.
Daryl Stansberry, 28 vjeç dhe Miles Moss, 24 vjeç u arrestuan si autorë të dyshuar. Ata akuzohen për tentativë vrasjeje dhe armëmbajtje pa leje, tha zëvendës shefi i policisë së Baton Rouge, Myron Daniels, i cili nuk përmendi asnjë arsye të mundshme të sulmit.
Hetuesit, megjithatë, “besojnë se ky është një incident i izoluar” dhe “nuk ka asnjë kërcënim të vazhdueshëm në kampusin e Universitetit Jugor”, tha Daniels. Policia i kërkoi çdo dëshmitari apo pjesëmarrësi në festë informacione në lidhje me të shtënat.
