Pa kapelën tradicionale hebree, të njohur gjerësisht si kippah, në kokë dhe me një shtrëngim duarsh me kryeministrin Yair Lapid, gjeneralmajor Herzi Halevi është emëruar zyrtarisht si shefi i ri i Forcave të Armatosura izraelite.
I 23-ti në kalvarin e gjatë të drejtuesve të Shtabit të Përgjithshëm të forcave izraelite, Halevi shihet si një figurë strategjike, të cilit do t’i duhet të ndërmarrë një sërë reformash për të arritur objektivat e vendosura ushtarake në Jerusalem.
Mbi të gjitha, duke parë tensionet e shtuara jo vetëm me palën palestineze, por edhe me Iranin.
Zyrtarë të lartë izraelitë, përfshi edhe ministrin e Mbrojtjes, Benny Gantz, kanë shprehur bindjen e plotë për rolin që Halevi do të luajë në riformatimin e Ushtrisë izraelite, duke parë edhe formimin e tij.
I lindur në vitin 1967 në një familje praktikante hebree në Jerusalem, Halevi do të bëhet i pari shef i Shtabit të Përgjithshëm me prejardhje të tillë, pavarësisht faktit se nuk e mban kippah-n në kokë.
Ai është i martuar dhe baba i katër fëmijëve.
Është i diplomuar në filozofi dhe në administrim biznesi nga Universiteti Hebre në Izrael, si edhe mban edhe titullin mjeshtër i shkencave në fushën e menaxhimit të resurseve kombëtare.
Këtë të fundit, e ka fituar nga Kolegji Kombëtar i Mbrojtjes në SHBA.
Si një oficer i lartë i përmbushur në radhët e Ushtrisë izraelite, pasi ka mbartur një sërë funksionesh në karrierën e tij të gjatë, tashmë detyra e tij do të shkojë në fuqizimin e faktorit izraelit ushtarakisht në rajon.
