Presidenti i Serbisë, Aleksandar Vuçiq, sot pritet të takohet në Beograd me përfaqësuesin e Posaçëm të Bashkimit Evropian për dialogun ndërmjet Kosovës dhe Serbisë, Miroslav Lajçak.
Sipas Presidencës së Serbisë, takimi pritet të fillojë në ora 18:30, por në njoftimin e 4 nëntorit nuk janë përmendur temat e diskutimit, e as nuk është paralajmëruar ndonjë adresim për media pas takimit.
Pas samitit të Procesit të Berlinit që u mbajt më 3 nëntor, kryeministrja e Serbisë, Ana Bërnabiq, u tha gazetarëve se ka pasur një bisedë të ndarë me shefin e diplomacisë së BE-së, Josep Borrell, dhe me të dërguarin për dialogun, Mirosllav Lajçak, me të cilët, siç tha ajo, ka folur për çështjen e riregjistrimit të makinave në Kosovë që kanë targa të lëshuara nga Serbia.
Qeveria e Kosovës, më 1 nëntor, ka filluar zbatimin e planit për riregjistrimin e veturave me targa që përmbajnë akronimet e qyteteve të Kosovës, të lëshuara nga autoritetet e Serbisë. Bëhet fjalë kryesisht për targa KM që janë të paligjshme për Kosovën, por që deri më tani janë toleruar vetëm në komunat në veri, ku jeton popullata shumicë serbe – Mitrovicë e Veriut, Leposaviq, Zubin Potok dhe Zveçan.
Plani aktual i Qeverisë së Kosovës është që procesi i riregjistrimit në targa RKS (Republika e Kosovës) të kryhet në tri faza – në të parën paralajmërohen shoferët, në të dytën mund të paguajnë gjoba prej 150 eurosh, ndërsa, në të tretën do të lëshohen targat e provës./Rel
