Radari i policisë rrugore po sfidohet nga një tjetër “Radar”. Një grup i krijuar në rrjetet sociale me emrin “Forca Tirona” sinjalizon shoferët për vendet ku policia ka ngritur postblloqe për ndalimin e mundshëm të tyre. Eksperti Ervin Karamuço ngre disa pyetje.
“Ka kohë që diskutohet në rradhët e prokurorëve dhe oficerë të policisë nëse fenomeni i ri “Forca Tirona” përmban apo jo ndonjë shkelje ligjore.
Ky është një grupim në rrjetet sociale, ku anëtarët lajmërojnë njëri tjetrin për vendodhjen e policisë, me qëllim shmangien e gjobave apo kontrolleve.
Argumentet janë të ndryshme, por përfundimi është se nuk ka asnjë shkelje që ti penalizojë. Përdoruesit e rrugës janë shpesh solidar me njëri tjetrin.
Ata shkëmbehen duke sinjalizuar me drita për të lajmëruar praninë e policisë në rrugë. Nga ana tjetër ligji detyron organet e policisë të paralajmërojnë shoferët për akset që monitorohen me radar.
Meraku i vetëm është që grupime të tilla nuk duhet të nxisin shpejtësi dhe papërgjegjshmëri rrugore, përtej zonave ku ka monitorim policor. Një gjobë edhe mund ta shmangësh, por aksidentin jo…..”shkruan ai.
