Kryeministri i sapoemëruar i Britanisë së Madhe, Rishi Sunak, do të vizitojë Ukrainën shumë shpejt.
Kështu deklaroi ambasadori i Ukrainës në Britaninë e Madhe Vadym Prystaiko, i cili foli për Sky News.
“Ne nuk do të diskutojmë datat për shkak të sigurisë së kryeministrit tuaj. Por ai do të vijë në Ukrainë shumë shpejt,” tha Prystaiko.
Më herët Rishi Sunak diskutoi mbështetjen për Ukrainën me presidentin amerikan Joe Biden, kryeministrin kanadez Justin Trudeau dhe presidentin francez Emmanuel Macron.
Më 25 tetor, Mbreti Charles III i Britanisë së Madhe miratoi zyrtarisht Rishi Sunak si kryeministër të vendit.
