Situata nuk është aspak e qetë në grupin e PS-së. Është deputeti Erion Braçe që u ka futur xixat duke i përçarë. Në mesnatë socialistët rrëzuan propozimin e tij për të përjashtuar nga TVSH-ja importin e mëshqerrave të mbarsura.
“Pas pikës 40, të nenit 56 Përjashtime të veçanta në import, shtohet pika 40/1 me këtë përmbajtje: 40/1.Importimi i mëshqerrave të mbarsura” ishte propozimi që u rrëzua.
Megjithëse amendamenti i tij ka gjetur mbështetje dhe tek opozita, kanë qenë vetë kolegët e grupit socialist që e kanë rrëzuar.
Pro amendamentit kanë votuar vetëm deputetët e PS-së Fatmir Xhafaj, Mimi Kodheli, Damian Gjiknuri, Nasip Naço dhe Eduart Shalsi, si dhe deputetët e opozitës.
Por shumica socialiste e rrëzoi. Kjo e ka irrituar socialistin e vjetër që në mesnatë lëshoi një postim në Facebook duke shkruar: “KOHA PER PUNE TJETER!”, duke lënë hapësirë për interpretime.
