Zëdhëndësja e PD-së, Floriana Garo ka reaguar ndaj qëndrimit të ambasadorit shqiptar në Mbretërinë e Bashkuar. Sipas saj, ambasadori, Qirjako Qirko turpëroi Shqipërinë dhe në seancën dëgjimore para një Komisionit të Parlamentit Britanik.
Garo tha se diplomati foli sikur të ishte ambasador i Enver Hoxhës dhe se ai nuk ishte në gjendje t’i përgjigjej shumicës së pyetjeve të parlamentarëve.
“Ambasadori ia hidhte fajin sa qeverive të huaja, dhe sa shqiptarëve nga trojet etnike në Ballkan duke përdorur një tezë të Sajmir Tahirit para disa vitesh se ata që emigrojnë në Gjermani janë shqiptarë të Greqisë.
Shkoi deri aty sa fajësoi edhe mediat sociale, të cilat sipas tij “u prishin mendjen shqiptarëve”, sikur të ishte thirrur në dëgjesë si psikolog për dëmin e komunikimit virtual, dhe jo përfaqësues zyrtar i shtetit.
Partia Demokratike ndjen keqardhje dhe alarm për degradimin e diplomacisë shqiptare nën qeverisjen e Edi Ramës.
Ne u bëjmë thirrje ambasadorëve të mbrojnë Shqipërinë dhe dinjitetin e saj, dhe jo pushtetin e Ramës, narkoshtetin dhe karrigen e vet.
Performanca e Ambasadorit është një kambanë alarmi për tredhjen e trupit diplomatik dhe shndërrimin e simboleve dhe përfaqësive të Republikës së Shqipërisë në një çiflig të orekseve dhe çrregullimeve të Edi Ramës,” tha Garo.
