Portugalia bën gati valixhet për t’u kthyer në shtëpi, pasi e mbylli rrugëtimin e Botërorit të Katarit që në çerekfinale pas humbje 1-0 kundër Marokut.
Mbrojtësi i luzitanëve, Pepe ka reaguar menjëherë pas eliminimit duke akuzuar arbitrin argjentinas, Fakundo Tejo për humbjen e tyre.
Sipas Pepe ata u eliminuan për shkak të mënyrës se si arbitri gjykoi ndeshjen.
Reagimi i plotë i Pepe:
“Është e papranueshme që një gjyqtar argjentinas të vërshëllejë për këtë ndeshje. Jam shumë i trishtuar, për atë që humbëm. Ishin 90 minuta ku ata u munduan gjithmonë të ndalnin lojën tonë me faulle të lehta, gjyqtari nuk jepte kartonë, nuk i tërhiqte vëmendjen. Kështu shkoi gjithë loja, vetëm faulle. Ata patën fatin që shënuan një gol. Ne punuam shumë dhe bëmë shumë për të fituar ndeshjen. Ishim gjithmonë para, pësuam në mënyrë të papritur një gol, por ishim gjithmonë më të fortë se ata. Ishte e papranueshme të kishim një gjyqtar argjentinas që drejtonte ndeshjen, pasi u dëgjuan fjalët e Mesit, ndërsa vjen e na gjykon argjentinasi. Në pjesën e dytë nuk u luajt aspak, ai dha vetëm 8 minuta shtesë. Vetëm ne deshëm të luanim në pjesën e dytë. Jemi të mërzitur, kishim cilësi për të fituar, për fat të keq nuk ia dolëm. Nuk na lejuan të luanim”
