Në 30 Tetor të këtij viti u ekzekutua te “Kodra e Diellit” Briken Sanaj.
Ai sapo ishte kthyer nga një dasmë në Lezhë, ku martoi shokun e ngushtë dhe më pas do të ikte drejt Italisë, por gjithçka u pre në mes. Plumbat i morën jetën në vend.
Vrasësi u zbulua disa javë më parë. Policia akuzon Vladimir Kolën, që dyshohet se e vrau pas një hasmërie të vjetër në Lezhë.
Por si u zbulua? Autori është fiksuar nga kamerat në Lezhë në momentin që mori makinën nga dy kosovarët për të kryer vrasjen.
Gjithashtu edhe pas krimit kamerat e kanë kapur te “Rruga e Kosovarëve”, ku ka marrë një taksi dhe ka udhëtuar drejt Lezhës. Në të gjitha këto pamje ai shfaqet me të njëjtat rroba.
Vladimir Kola jetonte në Belgjikë dhe në Shqipëri u kthye ilegalisht duke mos u regjistruar në TIMS me qëllim që të mos linte gjurmë dhe po kështu u largua. Por kamerat e sigurisë kanë dokumentuar itinerarin e tij nga Lezha në Tiranë për të kryer vrasjen dhe në kthim.
Ai është në kërkim së bashku me dy shqiptarë nga Kosova që e ndihmuan për blerjen e makinës që përdori për vrasjen.
