Pas fitores kundër Marokut dhe kualifikimit në finale ekipi francez i futbollit u trondit rëndë nga virusi që u shfaq te lojtarët e tyre.
Gjatë gjysmëfinales kundër Marokut ekipi ngeli pa Adrien Rabiot dhe Dayot Upamecan pasi u infektuan me një virus i cili është përhapur në Katar.
Ndërsa tani francezët kanë njoftuar se është infektuar edhe Kingsley Coman.
Shkak duket se është i ashtuquajturi “gripi i devesë”, një virus që po përhapet në Katar dhe po prek sportistët.
Virusi i përket familjes së corona virusit dhe prek sistemin respirator.
Lajmin për infektimin e Coman e ka konfirmuar trajneri francez Deschamps.
“Ai ka temperaturë. Ne po përpiqemi të bëjmë kujdes që të mos përhapet ky virus, i cili prek shumë lojtarë këtu në Kupën e Botës. Sëmuresh kur je shumë i lodhur, trupi yt dobësohet dhe je më i prekshëm”, ka thënë ai.
Franca do të luajë të dielën në finale me Argjentinën dhe mbetet të shihet se në cilët lojtarë do të mund të llogarisë Deschamps.
