Autoritetet shëndetësore kanë njoftuar sot se Evropa po përjeton gripin “më shkatërrues” të shpendëve të regjistruar ndonjëherë në Kontinentin e Vjetër për më shumë se një vit.
Sipas raportimeve rreth 50 milionë zogj janë therur në fermat ku u zbulua virusi.
Sipas raportit të Autoritetit Evropian të Sigurisë Ushqimore (EFSA), Qendrës Evropiane për Parandalimin dhe Kontrollin e Sëmundjeve (ECDC) dhe Laboratorin Komunitar të Influencës Aviane nga tetori 2021 deri në shtator 2022 Evropa u godit nga “gripi i shpendëve më shkatërrues shumë patogjenik (HPAI)”.
37 vende janë prekur dhe 2500 shpërthime janë identifikuar në fermat e shpendëve.
Humbjet në pulat, rosat apo gjelat në fermat e shpendëve janë në fakt më të larta pasi numri i 50 milionë zogjve të therur nuk përfshin therjet për arsye parandaluese rreth shpërthimeve të sëmundjes.
Gripi i shpendëve nuk është qetësuar që nga shtatori dhe në fakt infeksionet u dyfishuan me afrimin e dimrit.
EFSA thekson se për herë të parë nuk ka pasur pushim mes dy valëve të epidemisë, pasi virusi nuk u zhduk në verë.
Dhe kur erdhi vjeshta, epidemia u duk se u përkeqësua në krahasim me vitin e kaluar, me raste të regjistruara në më shumë se 35% të fermave të shpendëve.
Nga 10 shtatori deri më 2 dhjetor, rreth 400 shpërthime u zbuluan në 18 vende evropiane, me shumicën e tyre në Francë, Britani dhe Hungari.
Virusi është zbuluar gjithashtu më shumë se 600 herë te shpendët e egër, veçanërisht te shpendët e ujit.
Me kërkesë të Komisionit Evropian, EFSA po “shqyrton disponueshmërinë e vaksinave për HPAI dhe po studion strategjitë e mundshme të vaksinimit.
Rezultatet e këtij studimi do të shpallen në gjysmën e dytë të vitit 2023.
