Është një urdhër që vajzat dhe gratë në të gjithë Afganistanin e kishin frikë që kur u kthyen talebanët. Të mërkurën, vajzat me hixhabe u kthyen në kampuset e tyre universitare, por ato u bllokuan dhe u larguan nga rojet talebanë.
Pas përjashtimit të vajzave nga shumica e shkollave të mesme gjatë 16 muajve të fundit, talebanët këtë javë ndaluan gjithashtu arsimin universitar për gratë.
“Ata kanë shkatërruar urën e vetme që mund të më lidhë me të ardhmen time,” tha një student i Universitetit të Kabulit për BBC.
“Si mund të reagoj? Unë besoja se mund të studioja dhe të ndryshoja të ardhmen time ose të sillja dritën në jetën time, por ata e shkatërruan atë,” shtoi një tjetër vajzë.
Autoritetet lëshuan urdhrin të martën – dhe të nesërmen vende të tjera mësimi, duke përfshirë shkollat fetare islame dhe kolegjet private të shkollimit në disa provinca, po zbatonin gjithashtu vendimin.
Duket se të gjitha rrugët e edukimit formal për gratë po mbyllen.
Kjo bëri që disa gra të guxojnë të protestojnë të mërkurën në rrugë në Kabul – një akt i rrezikshëm duke pasur parasysh rekordin e talebanëve për ndalimin e protestuesve. Demonstratat e vogla u mbyllën shpejt nga zyrtarët talebanë.
