Helidon Bendo nuk është shkarkuar, por ka dhënë dorëheqjen. Kështu deklaron Edi Rama. Kryeministri ka postuar një foto me kreun e SHISH-it, sapo Presidenti Bajram Begaj nxori dekretin e lirimit. Kreu i qeverisë shprehet se Bendo u largua për arsye të studimeve në SHBA, nga ku do të këshillojë Edi Ramën për reformën e institucioneve të sigurisë.
“Me Helidon Bendon, Drejtorin e Shërbimit Informativ të Shtetit, i cili për arsye të vazhdimit të studimeve pasuniversitare në Kolegjin e Studimeve Ndërkombëtare e të Sigurisë, pranë Universitetit Kombëtar të Mbrojtjes në Shtetet e Bashkuara, ka dorëzuar dorëheqjen. Ai do të angazhohet në vijim si këshilltar i kryeministrit për reformën e institucioneve të sigurisë” shkruan Rama.
Përveç sqarimit, kryeministri njofton reformën në institucionet e sigurisë kombëtare që tashmë pritet që të çohet përpara nga Oljan Kanushi, që u emërua në gusht nëndrejtor, por që pritet që të marrë kompetencat e plota të shefit. Helidon Bendo e mori detyrën e drejtorit të SHISH-it në 5 Nëntor të 2018, por në vitin e fundit ai ka qenë me studime në SHBA.
