Njëqind ditë pasi filluan, protestat më të gjata antiqeveritare në Iran që nga revolucioni islamik i vitit 1979 kanë tronditur regjimin, por me një kosto të rëndë për njerëzit.
Më shumë se 500 protestues, duke përfshirë 69 fëmijë, janë vrarë. Dy protestues janë ekzekutuar dhe të paktën 26 të tjerë përballen me të njëjtin fat, pas atyre që Amnesty International i quan “gjyqe të rreme”.
Megjithëse demonstratat mbarëkombëtare kanë përfshirë Iranin më parë – një herë në 2017 që zgjatën deri në fillim të 2018 dhe një tjetër në nëntor 2019 – protestat aktuale janë unike, pasi ato përfshijnë njerëz nga e gjithë shoqëria dhe gratë po marrin një rol udhëheqës nën sloganin “Gruaja, Jeta, Liria”.
Disa të famshëm iranianë kanë ndërmarrë hapa të pakthyeshëm për të mbështetur protestat, duke çuar në arrestimin ose internimin e tyre.
Taraneh Alidoosti, një aktore e njohur iraniane, po mbahet në burgun famëkeq Evin pasi dënoi ekzekutimin e një protestuesi të ri. Paraprakisht ajo ka publikuar një foto pa shami të detyrueshme, ku mbante një tabelë me sloganin e protestuesve.
