Kreu i Kishës Ortodokse Serbe, patriarku Porfirije nuk u lejua të hynte në Kosovë të dielën pasdite.
Porfirije kishte planifikuar një vizitë treditore në Kosovë, por Ministria e Punëve të Jashtme e Kosovës tregoi sot se ajo kërkesë mund të aprovohej vetëm me një kusht.
“Pas shqyrtimit të kërkesës, MPJD është përgjigjur se vizita e Porfirjes, do të mund të aprovohet vetëm pasi Kisha Ortodokse Serbe të ketë dënuar, respektivisht të jetë distancuar nga veprimet e pjesëtarëve të KOS-it, të cilët duke hyrë ilegalisht në Republikën e Kosovës janë duke i dhënë përkrahje të hapur grupeve kriminale në veri të Republikës së Kosovës, të cilat janë përgjegjëse për barrikadat e vendosura atje”, thuhet në një njoftim për media.
Tanjug ka publikuar një fotografi të Porfirije në pikën kufitar në Merdar.
Patriarku ka qëndruar në veturë për disa minuta në anën e kontrolluar nga Policia e Kosovës dhe më pas është kthyer në Serbi.
