Presidenti i Turqisë, Rexhep Tayip Erdogan hoqi sot kufijtë e moshës së daljes në pension.
Një vendim që do të lejojë më shumë se 2 milionë punëtorë të dalin në pension menjëherë, më pak se gjashtë muaj para zgjedhjeve presidenciale.
Ky njoftim u bë në një konferencë për shtyp të dhënë nga Erdogan në pallatin presidencial.
Partia për Drejtësi dhe Zhvillim (AKP) në pushtet bëri një lëvizje të guximshme për të rritur pagën minimale javën e kaluar si pjesë e një fushate të nisur për të rifituar mbështetjen e votuesve që është gërryer nga inflacioni, rënia e paundit dhe përkeqësimi i mprehtë i kushteve të jetesës.
Mosha e daljes në pension ishte deri më tani 58 për gratë dhe 60 për burrat. Është e paqartë se sa do të kushtojë sistemi i ri, por Erdogan tha se 2.25 milionë njerëz kanë të drejtë të dalin në pension menjëherë.
Sot, pensionistët në Turqi arrijnë në 13.9 milionë.
Sindikatat protestojnë prej shumë vitesh duke kërkuar heqjen e kufijve të moshës dhe daljen në pension të punëtorëve pas plotësimit të numrit të kërkuar të ditëve të punës.
Vendimi pritet t’i japë Erdogan një shtysë përpara zgjedhjeve vendimtare në qershor.
Në dy dekadat e tij në pushtet, Erdogan ka shtypur disidencën dhe vitet e fundit ka miratuar një politikë ekonomike joortodokse që e ka zhytur lirën në një të dhjetën e vlerës së saj ndaj dollarit, krahasuar me barazinë e saj një dekadë më parë.
