Ministri i Jashtëm izraelit, Eli Cohen njoftoi të hënën se planifikon të marrë pjesë në një samit në mars me homologët e tij nga vendet arabe me të cilat Izraeli ka nënshkruar marrëveshje normalizimi.
Cohen, i cili mori detyrën javën e kaluar në qeverinë e Benjamin Netanyahut, qeveria më e djathtë në historinë e vendit tha se takimi do të mbahej në Marok.
Njoftimi nuk përmendi vende të tjera. Izraeli ka listuar më parë Marokun, Emiratet e Bashkuara Arabe, Bahreinin dhe Sudanin si anëtarë të marrëveshjeve të normalizimit, të njohura si “Marrëveshjet e Abrahamit”, një përpjekje diplomatike e sponsorizuar nga SHBA në vitin 2020.
“Zgjerimi i marrëveshjeve me vendet e tjera nuk është një çështje nëse, por kur”, tha Cohen, duke shtuar se lidhjet e Izraelit me partnerët aktualë gjeneruan 2.85 miliardë dollarë në tregti deri në vitin 2022 dhe “një kontribut të rëndësishëm për sigurinë (dhe) për stabilitetin rajonal”.
Netanyahu i cili tani hyn në mandatin e tij të 6 si kryeministër, ka shprehur shpresat për të vendosur marrëdhënie me Arabinë Saudite, e cila ndan shqetësimet e Izraelit për Iranin.
Por Riadi është me zemër të ftohtë ndaj një normalizimi të mundshëm në mungesë të përparimit në përpjekjet për shtetësinë palestineze.
Cohen tha se drejtorët e përgjithshëm të ministrive të jashtme të vendeve pjesëmarrëse në samitin e marsit janë planifikuar të takohen në Abu Dhabi javën e ardhshme.
