Lista tragjike e të vdekurve nga tërmeti 7.8 Rihter në Turqi dhe Siri po rritet vazhdimisht, duke kaluar tashmë 40 mijë.
Në konferencën e ofruar nga Tayyip Erdoğan pasditen e së martës, ai njoftoi se viktimat në Turqi tani arrijnë në 35 418, ndërsa nëse atyre u shtohen rreth 5 800 nga Siria (sipas të dhënave nga Kombet e Bashkuara dhe qeveria siriane), atëherë numri i përgjithshëm i të vdekurve arrin në 41 218.
Presidenti turk tha gjithashtu se pasgoditjet i kalojnë 3100, ndërsa efekti shkatërrues i tërmetit u përhap në një sipërfaqe prej 500 kilometrash.
Ai raportoi gjithashtu se të lënduarit kanë arritur në 105 505, ndërsa 369000 objekte janë kontrolluar për dëme nga radhët e Ministrisë së Mjedisit.
Ndërkohë, sipas të dhënave të publikuara nga kompania amerikane e vlerësimit të rrezikut Verisk, dëmet nga tërmetet në Turqi me siguri do të kalojnë 20 miliardë dollarë.
Vetëm një pjesë e humbjeve mbulohen nga sigurimet, shtoi Verisk.
Kompania tha gjithashtu se strukturat që janë në përputhje me rregulloret e ndërtimit “kanë performuar relativisht mirë, ndërsa shumë të tjera kanë pësuar dëme të konsiderueshme dhe janë shembur gjatë tërmeteve”.
