Afera e inceneratorëve vijon që të “gllabërojë” lekët e shqiptarë çdo ditë.
E ndërsa për inceneratorët e Fierit dhe Elbasanit dosja është në gjyq, për Tiranën ende nuk ka asnjë lëvizje nga prokuroria, ndërsa pushteti vendor dhe qendror i drejtuar nga socialistët vijon që të paguajë pronarët që janë shpallur në kërkim.
Më 14 shkurt, kryebashkiaku i Tiranës, Erion Veliaj dhe ajo e Durrësit, Emirjana Sako kanë kaluar edhe 250 mijë euro të tjera në llogarinë e Klodian Zotos, në favor të kompanisë së mbetjeve në landfillin e Sharrës.
220 milionë lekë të vjetra nga Bashkia e Durrësit dhe 80 milionë lekë të vjetra nga Bashkia e Tiranës i kaluan ditën e Shën Valentinit. Një dhuratë për të festuar në arrati me lekët e shqiptarëve për një punë që nuk bëhet.
Pak ditë më parë u ndalua në Vjenë Stela Gugallja, ndërsa në kërkim vijojnë që të jenë Klodian Zoto dhe Mirel Mërtiri.
