13 ditë asnjë gjurmë. Një 32-vjeçar, dyshohet përdorues droge nga lagja “Uznovë” në Berat rezulton i zhdukur. Sokol Ago ka dalë nga shtëpia e tij mesditën e 15 shkurtit dhe që prej asaj dite familjarët nuk e kanë parë më dhe nuk dinë asgjë për vendndodhjen e tij.
Nëna e tij, 63-vjeçarja Hajrie Ago ka denoncuar zhdukjen e djalit dhe ka kërkuar ndihmën e policisë për gjetjen e tij. Gjatë kryerjes së denoncimit ajo ka dhënë edhe të dhënat fizike të djalit dhe mënyrën e veshjes së tij ditën e largimit nga banesa.
32-vjeçari është 1.70 i gjatë, me sy kafe dhe ditën e 15 shkurti sipas nënës kishte veshur një palë pantallona xhins ngjyrë blu, një xhup të zi lëkure dhe këpucë të zeza, ndërkohë që celularin e kishte lënë në shtëpi.
