Prokuroria e Posaçme (SPAK) në një deklaratë në faqen zyrtare ka reguar për hetimet në lidhje me ish-zv/ kryeministrin Arben Ahmetaj për dosjen e inceneratorëve dhe lajmet në media për dy prokurorët Ened Nakuçi dhe Klodian Braho.
Pas furtunës me akuza dhe padi, prokurori Klodjan Braho, SPAK thotë, se ka kërkuar largimin nga dosja dhe është zëvendësuar nga prokurore Enkeleda Millonaj. Sa i përket hetimit, SPAK thotë se procedimi për Ahmetajn është veçuar për dosjen e inceneratorit të Elbasanit që është në gjyq, por nuk jep asnjë informacion mbi kontrollet që u zhvilluan mbrëmë në shtëpinë e ish-gruas dhe partneres së Ahmetajt.
“Në lidhje me veprimet e kryera nga shtetasi Arben Ahmetaj në cilësinë e Ministrit të Zhvillimit Ekonomik dhe Sipërmarrjes, Ministrisë së Drejtësisë, si dhe në lidhje me disa fakte dhe rrethana të tjera që kanë rezultuar nga hetimet e paraprake, është vendosur ndarja e çështjes penale duke u rregjistruar proçedimi penal nr.277/1, datë 19.09.2022.
Ky proçedim penal është hetuar nga prokurori Klodjan Braho dhe është ndarë si proçedim penal më vete para se prokurori Ened Nakuçi të bëhej pjesë e grupit hetimor për proçedimin penal nr.277 viti 2020.
Aktualisht, proçedimi penal nr.277/1 viti 2022 është duke u hetuar nga prokurore Enkeleda Millonaj, pasi me vendimin e Drejtuesit të Prokurorisë të datës 30.01.2023 është vendosur zëvendësimi i prokurorit Klodjan Braho, me kërkesë të këtij të fundit.
Prokuroria e Posaçme kundërshton çdo tentativë për intimidim dhe sulme personale ndaj prokurorëve të posaçëm që synon t’i kufizojë ata nga kompetenca dhe përgjegjësia e tyre për të ushtruar ndjekjen penale sipas Kushtetutës dhe ligjit” mbyllet deklarata.
FOTO/ Momenti kur SPAK-u shkoi vilën e partneres së Ahmetajt
