Kryetari i komanduar i PD-së, Enkelejd Alibeaj ka reaguar pasi, Komisioni i Ankimimeve dhe Sanksioneve vendosi të regjistrojë Partinë Demokratike në zgjedhjet e 14 majit dhe të njohë atë si kryetar partie.
Në një postim në Facebook Alibeaj, shkruan se vendimi i sotëm i KAS është konfirmim i detyrimit ligjor. Gjithashtu i bën thirrje të gjithë kandidatëve demokratë të bashkohen për një kandidat të vetëm.
Postimi i plotë:
Vendimi i sotëm i KAS është konfirmim i detyrimit ligjor për të regjistruar PD në zgjedhjet lokale të 14 majit. Vonesa gati dy javore për këtë proces, me autor kryekomisionerin Celibashi është një dëm që u është bërë demokratëve dhe shqiptarëve nga zgjatimet e politikës së vjetër në institucionet e pavarura kushtetuese.
Me këtë rast, edhe njëherë ftojmë të gjithë kandidatët demokratë, pa asnjë dallim të bashkohemi dhe të prezantohemi me një kandidat të PD në zgjedhjet lokale. Le të lemë mënjanë mëritë dhe mosmarrveshjet dhe le të bëjmë më të mirën e mundshme përballë regjimit të Edi Ramës.
Gjithashtu pas vendimit të KAS ka reaguar edhe deputeti Gazmend Bardhi i cili në postim në Twitter shkruan se Ilirjan Celibashi është “nongrata” për PD dhe nuk gëzon asnjë besim për administrim të paanshëm, profesional dhe ligjor të zgjedhjeve të 14 Maj.
Postimi i Bardhit:
Qokat politike nuk e kanë të gjatë kur bëhen në kurriz të ligjit. Ilirjan Celibashi është “nongrata” për PD dhe nuk gëzon asnjë besim për administrim të paanshëm, profesional dhe ligjor të zgjedhjeve të 14 Maj. Zvarritja 10 ditore në shkelje të ligjit ka cënuar rëndë zgjedhjet!
— Gazment Bardhi (@GazmentBardhi) March 16, 2023
