Një grup nga shoqëria civile protestoi sot përpara Prokurorisë së Posaçme. Me pankarta në duar dhe thirrje qytetarët kërkuan drejtësi për disa çështje të reja dhe të vjetra. Ata u shprehën se qëndrojnë në krah të kreut të SPAK-ut, Altin Dumani, por kërkojnë që në rrjetë të futen “peshqit” e mëdhënj dhe jo “cironkat”.
“Ku është floriri i Krrabës? Ku shkuan milionat e vjedhura të Rrugës së Kombit? Kush ja fali detin Greqisë? Pse nuk vepron politika shqiptare në mbrojtje të të drejtave kombëtare e njerëzore të shqiptarëve në rajon e botë?
Kush e vrau Remzi Hoxhën? Duam trupin! Pse e vranë Kosta Trebickën? A ka prapaskena politike dekorimi nga kisha greke i dy kryeministrave të Shqipërisë?
Objekt i kësaj proteste është nxitja e mbështetja e punës së Institucioneve të drejtësisë e veçanërisht të Strukturës Antikorrupsion, në drejtim të hetimit, zbulimit e ndëshkimit të krimeve, të krerëve më të lartë të politikës e drejtësisë shqiptare, në këto 30 vite demokraci.
Qytetarët shqiptarë kërkojnë me insistim, që ata politikanë që kanë vjedhur e kanë vënë dorë mbi pasurinë e popullit, të hetohen, të çohen në sallën e gjyqit, tu konfiskohet pasuria e të dënohen për fajet që i kanë bërë popullit shqiptar…” tha njëri nga qytetarët.
