Qeveria socialiste për këto zgjedhje lokale deri tani nuk ka paraqitur ndonjë program, por është mbështetur vetëm tek rritja e pagave për të gjithë sektorët në administratë. Fushatën e udhëheq vetë kryeministri në Facebook duke postuar thuajse cdo ditë shembull të rritjes së pagave. Sot është ndaluar te arsimit fillor duke marrë shembullin e një mësueseje, së cilët paga duke filluar nga ky muaj i rritet në 66480 dhe vitin tjetër i arrin në 76752 lekë. Të gjithë mësuesit në këtë kategori do të përfitojnë këtë pagë, sipas kreut të qeverisë.
“Pagat e reja, falë të cilave paga mesatare në Shqipëri thuajse dyfishohet duke arritur majën historike të 900Eurove në 2024, janë frut i një përpjekjeje të gjatë, këmbënguljeje e durimi të madh për reforma të vështira e masa të domosdoshme për ekonominë dhe për financat tona, rritjeje të të ardhurave falë rritjes së ekonomisë, tregtisë, investimeve publike e private, rritjes së prodhimit e të eksporteve, modernizimit të sistemit të mbledhjes së taksave përmes kompjuterizimit të transaksioneve në kohë reale, lehtësimit e rritjes së shpejtësisë së shërbimeve për biznesin falë digjitalizimit të tyre, forcimit të shtetit në tërësi dhe uljes së ndjeshme të korrupsionit në tatime e dogana, po mbi të gjitha, pagat e reja janë frut i punës sonë të përbashkët, të çdo shqiptari e shqiptareje, që në shtet a në privat, kontribuon për ekonominë shqiptare me punën e vet” shkruan Rama.
