Rrëmbimi i dy 46-vjeçarëve në Sarandë, mjeti i përdorur edhe në një krim tjetër

17 ditë agoni dhe pa asnjë informacion për të afërmit e 46-vjeçarët, Leonard Thodhori dhe Fatmir Sulovari duket se po u shkon drejt fundit pasi ditën e sonte dyshohet se dy 46-vjeçarët mund të jenë të groposur në fshatin Vrinë të Bashkisë Konispol.

Mbrëmjen e djeshme policia shtroi pistën që të zhdukurit mund të jenë ekzekutuar.

Pas informacioneve se të zhdukurit mund të jenë groposur që prej orëve të mëngjesit, rreth 50 familjarë të Fatmir Sulovarit janë nisur drejt kësaj zone për ta krehur fizikisht dhe me mjete logjistike me qëllim gjetjen e trupave.

Ndërkohë detaje të tjera janë zbuluar nga ekspertët kriminalistë të cilët kanë krahasuar të dhënat e automjetit tip “Mercedes-Benz” të gjetur të fshehur në afërsi te fshatit Nivicë, Bashkia Himarë, me një ngjarje tjetër.

Nga pamjet filmike të siguruara në ngjarjen e datës 5 dhjetor 2022 ku në banesën e shtetasit L. L., u vendos një sasi eksplozivi, rezulton se mjeti i dyshuar është një “Mercedes-Benz” E Class.