Tre persona, të dyshuar si autorë të vrasjes së biznesmenit Ardian Nikulaj në Shëngjin javën e kaluar janë arrestuar në Angli.
Policia e Shtetit njoftoi se policia britanike mundi të lokalizojë në Londër, të kapë dhe të vërë në pranga, me qëllim ekstradimin drejt Shqipërisë, 3 prej të shpallurve në kërkim, Edmond Haxhia, Stephen Hunt dhe Thomas Mithan.
Të tre janë arrestuar në Londër përmes një operacioni të gjerë policor, një ditë pas marrjes së kërkesës nga Ministria e Drejtësisë e Shqipërisë. E ndërsa dy të tjerët, vëzhguesit anglezë që ishin në Shëngjin janë në kërkim brenda ishullit, fati i ekzekutorit nuk dihet.
Ruben Saravia, i cili ka precedentë në krim dhe drogë, sipas autoriteteve nuk ndodhet në Britani. Portugezi u largua nga Kapshtica dhe pas hyrjes në Greqi fati i tij nuk dihet.
Tre të arrestuarit për vrasjen e biznesmenit, policia: Do ekstradohen nga Londra
