Policia britanike njoftoi sot se bëri 52 arrestime gjatë operacionit të tyre në ceremoninë e kurorëzimit të mbretit Charles.
Të arrestuarit po mbahen për një sërë veprash, duke përfshirë grindjet, prishjen e qetësisë dhe komplot për të shkaktuar shqetësim publik.
Në një deklaratë, policia e Londrës tha se të gjithë të arrestuarit mbeten në paraburgim dhe mbrojti veprimin e tyre për të kryer arrestimet e shumë kritikuara, duke thënë se ata kishin informacione për planet për të prishur ngjarjen historike.
Forcat e zbatimit të ligjit arrestuan dhjetëra ambientalistë që planifikonin veprime përgjatë rrugës së kortezhit mbretëror, si dhe të paktën gjashtë aktivistë kundër monarkisë, duke përfshirë udhëheqësin e Republikës Graham Smith i cili kishte organizuar një demonstratë në sheshin Trafalgar.
Policia Metropolitane e Londrës tha se kishte “marrë informacion që tregonte se protestuesit donin të prishnin procesionin mbretëror”.
“Ai përfshinte informacione që tregonin se individë donin të përpiqeshin të vandalizonin monumentet me bojë, të shkelnin barrikadat dhe të prishnin trafikun zyrtar,” tha Scotland Yard.
Aksioni i policisë, i cili kishte vendosur më shumë se 11,000 oficerë sot u kritikua nga grupet e të drejtave të njeriut.
