Pas 1 viti e gjysmë në qeli, ish-ministri i Brendshëm, Samir Tahiri është liruar nga burgu. Ai do të kryejë pjesën e mbetur të dënimit në shtëpi. Vendimi është marrë ditën e sotme në gjykatën e Elbasanit, nga gjyqtarja Matilda Fetahu. Tahiri është liruar për shkak se një familjar i tij është sëmur. Gjykata e pranoi kërkesën duke qenë se ka kaluar më shumë se gjysmën e dënimit në burg.
Por edhe sa vite i kanë ngelur për të shlyer, që do t’i kalojë në shtëpi?
Ish-ministri do të kalojë i izoluar në shtëpi një vit, shtatë muaj e 11 ditë burg. Ndërkohë që procesi ndodhet në gjykatën e Lartë për pafajësi. GJKKO e dënoi Saimir Tahirin me 5 vite burg për “Shpërdorim të detyrës”, por me gjykim të shkurtuar dënimi iu ul në 3 vite e 4 muaj burgim.
Tahiri u dënua vetëm për “Shpërdorim detyre” duke i shpëtuar akuzave “Korrupsion të zyrtarëve të lartë”, “Trafik të lëndëve narkotike, kryer në bashkëpunim” dhe “Grup të strukturuar kriminal”.
Tahiri rezultonte se kishte favorizuar grupin kriminal të drejtuar nga Moisi Habilaj, i cili kishte funksionuar në shtetin Italian. Sipas Apelit të Posaçëm, nga karrigia e ministrit të brendshëm, Saimir Tahiri ka lejuar me ndërgjegje që vëllezërit Habilaj të përdorin lidhjet ndër personale me të si kredenciale dhe ka lejuar me ndërgjegje të marrë edhe përfitime të padrejta për shkak të detyrës, së ushtruar në mënyrë abuzive.
