Ish-kryeministri italian, Silvio Berlusconi është rikthyer në spital pak kohë pas daljes.
Sipas agjencisë italiane të lajmeve ANSA, 86-vjeçari është shtruar në spitalin San Raffaele në Milano.
Gazeta italiane La Repubblica raportoi se Berlusconi ndodhet në një repart në katin e parë të spitalit, ndaj nuk është në terapi intensive. Por shtrimi i tij në spital ndoshta do të zgjasë disa ditë.
Berluskoni doli nga i njëjti spital më 19 maj 2023, pas 45 ditësh shtrimi në spital, duke përfshirë 11 në njësinë e kujdesit intensiv.
Ai u shtrua më 5 prill për shkak të një infeksioni në rrugët e frymëmarrjes dhe problemeve shëndetësore për shkak të një forme kronike të leukemisë.
Nesër Berlusconi kishte planifikuar një takim samit me shtabin e përgjithshëm të partisë së tij Forza Italia në vilën e tij në Arcore.
