Tensionohet akoma më shumë situata mes Kosovës dhe Serbisë. Ministri i Punëve të Brendshme, Xhelal Sveçla deklaroi sot se Serbia “ka hyrë në territorin e Kosovës dhe ka rrëmbyer 3 zyrtarë policorë”. Sveçla tha se kjo është shkelje e çdo marrëveshje dhe kundër çdo parimi të normave ndërkombëtare.
“Pa asnjë dyshim, zyrtarët tanë policorë kanë qenë të vendosur thellë brenda territorit të Republikës së Kosovës, në pikë kontroll statik, duke kryer detyrat e tyre të rregullta”, shkroi Sveçla. Ministri ka kërkuar nga faktori ndërkombëtar që “të rrisë urgjentisht presionin ndaj Serbisë që jo vetëm të lirojë zyrtarët tanë policorë por edhe të ndalë provokimet e saj”.
FOTO/ Momenti i arrestimit dhe emrat e policëve të Kosovës që arrestuan serbët
“Përderisa rendi dhe ligji po zbatohet në vendin tonë, Serbia kriminale ka hyrë në territorin e Kosovës dhe ka kidnapuar 3 zyrtarë policorë të Republikës së Kosovës, në shkelje të çdo marrëveshje e kundër çdo parimi të normave ndërkombëtare.
Pa asnjë dyshim, zyrtarët tanë policorë kanë qenë të vendosur thellë brenda territorit të Republikës së Kosovës, në pikë kontroll statik, duke kryer detyrat e tyre të rregullta.
Serbia po vazhdon të jetë shkaktar dhe gardian i së keqes në rajon e në Kosovë. Ne nuk zmbrapsemi para kriminelëve e terroristëve. Serbia po tregon përsëri fytyrën e saj të vërtetë dhe atë të një shteti autokrat e agresor.
Kërkojmë nga faktori ndërkombëtar të rrisë urgjentisht presionin ndaj Serbisë që jo vetëm të lirojë zyrtarët tanë policorë por edhe të ndalë provokimet e saj. Sjellje të tilla kriminale të Serbisë nuk na ndalin në rrugëtimin tonë të forcimit të sovranitetit në vend” shkruan ministri.
Mediat në Beograd: Policia serbe arrestoi tre policë të Kosovës
