Deputeti i PDK-së, Hisen Berisha ka reaguar në lidhje me rrëmbimin e 3 policëve ku sipas tij ngjarja ka ndodhur brenda territorit të Kosovës xhandarmëria e Serbisë ka hyrë në vend.
Berisha shtoi se ata u kanë dalë prapa shpine policëve të Kosovës dhe pastaj i kanë rrëmbyer.
“Kam kontakte me policinë, ata janë kapur nga vija e kufirit 150 metra në territor të Kosovës. Sipas informacioneve, policët i kanë vërejtur lëvizjet e tyre në drejtim të kufirit. Duhet përcjellë komunikimin që janë bërë në ato rrethana.
Ata janë futur në territorin e Kosovës, i kanë dalë pas shpine, pas një joshje, këto janë veprime taktike dhe i kanë kapur”, u shpreh ai.
“Nuk është e mundur t’i ofrohesh policisë përballë kur ka armë në dorë. Kur thërret nga pas shpine, ndal se të vras, çdo lëvizje është vdekjeprurëse.
Nuk është hera e parë që Serbia ka bërë këso veprime. Aziz Kelmendin e kanë vrarë, e kanë vendosur te rrethojat e kazermës.
Kanë gjuajtur në rojën e postës dhe e kanë faturuar se ai ka gjuajtur dhe e kemi vrarë në ikje. Kjo është njëlloj “Pande” për ta arsyetuar atë çfarë po do me arrit Serbia”, shtori Berisha.
